Quen non xogou algunha vez a destruír bloques ou ladrillos valéndose dunha bóla que rebotaba de arriba a abaixo, de esquerda a dereita da pantalla e que conviña non deixar caer polo fondo da pantalla, pois ter bólas supuña ter vidas e ter, así, máis probabilidades de superar máis niveis. Seguramente todos e todas de nós xogamos, fose no salón de xogos ao pé do instituto, no Spectrum dun colega ou nas primeiras maquiniñas de músicas inconfundibles que precederon ás consolas… O que non teño tan claro é que ata agora se puidese xogar nalgunha das plataformas en lingua galega… apostaría a que non e o risco, penso, había ser ben pequeno…
Tivo que ser a súa chegada a Android cando xa iso é posible desde hai unhas semanas. Son moitas as réplicas do xogo que hai neste sistema, mais a nós hoxe interésanos falar de ArkanoidX que desde a súa versión 1.7 conta coa tradución ao galego das lendas e textos de axuda. O xogo dispón de catro modalidades que se distribúen polos 190 niveis de que consta. Hai ata 21 poderes dos que botar man, as velocidades da bóla son tres e as posibilidades de manexar o xogo dúas: táctil ou por inclinación do dispositivo (as dúas, especialmente a segunda, ben interesantes). Algunhas destas cifras aínda aumentan lixeiramente na versión de pagamento que, ademais, inclúe a opción de se conectar a Google Play Game Services.
Se o xogo non se descarga na lingua que teña o dispositivo como predefinida, hai opción de cambiala en Opcións–>Idioma.
Así pois todo un clásico dos xogos de arcade xa dispoñible en lingua galega!
Está en galego!? 